روغتياپوهان وټامن ډي له هغو مهمو غذايي عناصرو بولي چې د انسان بدن ورته سخته اړتيا لري او کمښت یې د سختو ناروغيو د رامنځته کېدو لامل کېږي، د بېلګې په ډول وټامن ډي د هډوکو پياوړتيا، د دفاعي سيستم روغتيا او عمومي فعاليت لپاره ډېر اړين دی او کمښت يې په انسان کې د ستړيا احساس، د عضلاتو کمزوري او مزاج خرابېده رامنځته کوي.

څېړنو ښودلې چې د وټامن ډي تر ټولو لويه سرچينه د لمر وړانګې دي چې د انسان په پوستکي ولګېږي، خو سره له دې چې ښايي ډېری خلک له دې خبر وي، خو بيا هم د وټامن ډي له کمښته کړېږي او دا کچه ورځ له بلې مخ په ډېرېدو ده.

د وټامن ډي د کمښت زيانونه کوم دي؟

 د «د هيلت سايټ» وېبپاڼې له يوه مطلب سره سم د دغه غذايي توکي کمښت ښايي د انسان روغتيا خورا اغېزمنه کړي، چې ځينې تاوانونه يې د سختې ستړيا احساس، تکرارېدونکی التهاب يا ناروغۍ، د هډوکو کمزوري، د ملا دردونه، خراب مزاج، ويښته تويېدل، زخمونه ژر نه رغېدل، د عضلاتو کمزوري او تشنجات، د هډوکو پوده کېدل او د ماتېدو وېره دي.

بدن کې د وټامن ډي کچه څنګه پوره کړو؟

د لمر وړانګې

د دې تر ټولو غوره لار د روغتياپوهانو په اند سهار مهال کې د يوه ساعت لپاره د لمر وړانګو ته ځان ښودل دي، په ځانګړي ډول د لاسونو، مخ او پونډيو برخې. د هيلت سايټ له لارښوونو سره سم که څوک سهار مهال لمر ته نه شي وتی، نو بل هر وخت چې د لمر تودوخه ډېره نه وي؛ همدا ګټه لري.

خپلې چارې د لمر رڼا کې ترسره کړئ

د بېلګې په ډول تاسو کولی شئ د سهار چای لمر ته وڅښئ، يا د ورځې په اوږدو کې د لمر تر وړانګو لاندې يو ساعت مطالعه وکړئ، ان د ورځې په رڼا کې يو لنډ چکر وهل د وټامن ډي د کچې په لوړولو کې مرسته کوي.

وټامن ډي لرونکي درمل خوړل

ډاکټران ټينګار کوي، که يو څوک په طبيعي توګه وټامن ډي نه شي ترلاسه کولی، نو د هغو درملو د خوړلو له لارې يې بايد ترلاسه کړي، چې بدن کې وټامن ډي پوره کوي.

غذايي نظام ته د مرخېړيو ورزياتول

مرخېړي يا زمکۍ غوښه هم د روغتياپوهانو په اند يو غوره حل دی، چې انسان دغه نباتي سرچينه په خپلو خوړو کې ورزياته کړي او له دې لارې د بدن وټامن ډي پوره کړي.

په وټامن ډي بډای خواړه خوړل

لکه سالمون، سارډین او ټونا کبان، د هګيو ژېړ، شيدې، حبوبات او د مالټو جوس چې ورځينيو خوړو کې يې ورزياتول د بدن د وټامن ډي کچه لوړولی شي.