تورخم بندر کې واردېدونکي ۱۳ مټریک ټنه خوسا شوي کچالو مسترد شوي
د ننګرهار ولایت کرنې، اوبو لګولو او مالدارۍ ریاست ویاند اجمل سبحاني حریت راډیو ته ویلي، د تورخم بندر نباتي قرنطین مدیریت کارکوونکو له پاکستان واردېدونکي ۱۳ مټریک ټنه خوسا شوي کچالو نیولي دي.
دغه محصول د یوه کورني شرکت له لوري هېواد ته واردېدل، چې د کرنې ریاست کارکوونکو له لورې تشخیص او بېرته یاد هېواد ته مسترد شوي.
د ننګرهار کرنې ریاست یوځل بیا له ټولو سوداګرو غوښتني ، چې د بې کیفیته توکو له واردولو ډډه وکړي.
وړاندې له دې هم دننګرهار کرنې ریاست له پاکستان هېواده د واردېدونکو بې کیفیته توکو مخه نیولې او بېرته یې یاد هېواد ته مسترد کړي دي.
