پاکستان هند سره له جګړې شاتګ وکړ؛ که هند بریدونه ودروي دوی به هم ځواب ورنه کړي
د پاکستان د بهرنیو چارو وزیر محمد اسحاق ډار تازه هند ته وړاندیز کړی، که دوی بریدونه ودروي پاکستان به هم ځواب ور نه کړي.
اسحاق ډار هند ته د روان جنګي کړکېچ هواري په موخه د مخامخ دوه اړخیزې غونډې لپاره چمتووالی ښودلی.
اسحاق ډار داسې مهال دغه څرګندونې کړې، چې د دواړو هېوادونو ترمنځ بریدونه څلورمې ورځې ته غځېدلي.
هند او پاکستان ترمنځ تاوتریخوالی وروسته له هغې په مخامخ جګړې بدل شو، چې د هند تر ولکې لاندې کشمیر کې پر سیلانیانو برید کې ۲۶تنه ووژل شول، چې هند پاکستان دې برید کې په لاس لرلو تورن کړ.
یاده دې وي، چې د هند او پاکستان ترمنځ په یو بل د بریدونو له پیله تر دې مهال دواړه خواوې یو بل ته د درنو زیانونو اوښتلو خبره کوي او یو بل د جګړې پر غځولو تورنوي.
